Bref du Pape Pie IX
17 mars 1864
Rome,
le 24 mars 1864.
Monsieur le Curé,
Sa Sainteté vient de m'envoyer un Bref avec
ordre de le porter à votre connaissance, sans
aucun délai. Par cet acte de la Volonté
Pontificale, le Pape a mis fin à des discussions
qui se sont trop prolongées ; mais il y a mis fin avec des ménagements que Sa Bonté lui a inspirés. Il ne nous reste plus qu'à obéir
et à oublier des dissentiments qui ne se reproduiront jamais, j'espère, au
milieu de nous.
Agréez, Monsieur le Curé,
l'assurance de mon inviolable attachement.
L.-J.-M. Cardinal de BONALD
Archevêque de Lyon
Dilecto
Filio Nostro Ludovico Presbytero S. R. E. Cardinali De Bonald, Archiepiscopo Lugdunensi.
PIVS PP. IX.
Dilecte Fili Noster, Salutem et Apostolicam Benedictionem. Non mediocri animi Nostri molestia
noscebamus, Dilecte Fili Noster, antiquam Lugdunensis Ecclesiae Liturgiam pluribus mendis misere fuisse corruptam ab uno ex Tuis Praedecessoribus, qui id agere minime dubitavit non solum contra sapientissimam Sancti Decessoris Nostri Pii V. Constitutionem
incipientem « Quod a Nobis
postulat, » ac septimo Idus
Julii anno millesimo quingentesimo sexagesimo octavo editam, cui universus
catholici orbis Clerus obedire tenetur, verum etiam contra sententiam et expostulationes Collegii illius temporis Metropolitani Lugdunensis Templi Canonicorum, qui adversus novitates ab eodem Tuo Praedecessore
in ipsam Liturgiam perperam inductas solemni modo reclamare, ac protestari haud
omiserunt. Nos itaque de illustris Lugdunensis Ecclesiae splendore, deque commemoratae Pii V. Constitutions
observantia vehementer solliciti, Te, Dilecte Fili Noster, omni studio excitavimus,
ut praeclara omnium fere clarissimorum Galliae Sacrorum Antistitum exempla aemulans, Nostrisque obsequens desideriis Romani Missalis et Breviarii usum in Lugdunensem Diœcesim Tuae curae
commissam induceres. Atque eodem tempore
Tibi significavimus, a Nobis permitti, ut vetus Lugdunensis Ecclesiae Liturgia ab omni tamen labe purgata
posset etiam in posterum conservari. Quibus justissimis Nostris votis pro eximia Tua erga Nos et hanc Apostolicam Sedem fide ac
reverentia obsecundans, ac probe noscens, quomodo Lugdunensis Tuae Ecclesiae Liturgia fuisset deformata, manum operi summa alacritate,
libentissimoque animo admovisti, ac propria
Tuae Diœcesis Sanctorum, uti vocant, officia una cum Kalendario conficienda curasti. Hinc, Dilecte Fili Noster, Romam Te contulisti, ut omnia supremo Nostro,
et hujus Sanctae Sedis judicio ex majorum more subjiceres, et hujusmodi negotium ad optatum exitum adduceres. Nos igitur idem Kalendarium et
officia Nostrae Congregationi
legitimis ritibus cognoscendis praepositae examinanda commisimus, eidemque Congregationi in mandatis dedimus, ut priscam Lugdunensis Ecclesiae Liturgiam ab omnibus novitatibus, quibus illam tuus Praedecessor
infecerat, diligenter expurgaret.
Rebus autem omnibus ab eadem
Congregatione diligentissimo
examine perpensis, et accurate
ad Nos delatis, veluti
optime agnoscis, statutum
fuit, ut in Lugdunensem Diœcesim
Romanum Missale et Breviarium sensim induceretur, utque vetusta Lugdunensis Ecclesiae Liturgia, omnibus mendis penitus eliminatis, posset futuris quoque temporibus servari. Dum vero ea
spe nitebamur fore, ut hujusmodi res, quae bonis omnibus, ac praesertim Lugdunensibus summam attulit laetitiam, secundum Nostra ac Tua desideria
sine ulla molestia prospere succederet, dolere debuimus improbandam non-nullorum Lugdunensium Parochorum agendi rationem. Hi enim vel ab
ipso hujusce negotii exordio minime veriti sunt in hac re, cujus judicium
ad supremam Nostram, et Apostolicae
hujus Sedis auctoritatem unice pertinet, Nostrae ac Tuae voluntati obsistere. Neque extimuerunt tum per libellos typis editos, et erroribus infectos, et in hanc Sanctam Sedem,
ac in Venerabiles Fratres Galliae Sacrorum Antistites maxime injuriosos, tum per publicas
ephemerides huic Sanctae Sedi adversas spectatum
Galliae Clerum Nobis et huic Petri Cathedrae addictum contra Romanae Ecclesiae
Liturgiam inter alia excitare.
Quae Parochorum contumacia
eo magis est redarguenda, quod cum aliqui ex ipsis in hanc almam
urbem Nostram venissent, et in conspectum Nostrum fuissent admissi paternis Nostris monitis et exhortationibus acquiescere noluerunt, quibus prompto alacrique animo obedire debuissent, quemadmodum ecclesiasticos viros omnino decet.
Quapropter, ut hujusmodi res ex Nostris Tuisque votis suum
tandem assequatur exitum,
has Tibi scribimus Litteras, quibus denuo Nostram voluntatem
clare aperteque significamus. Etenim volumus, prœcipimus et
mandamus, ut, veluti fuit constitutum
in Lugdunensem Diœcesim Romanum Missale et Breviarium sensim inducatur, ut scilicet ii omnes, qui in posterum sacro Subdiaconatus Ordine rite fuerint initiati, teneantur et canonicas horas recitare juxta Romanum Breviarium, et illa Sanctorum officia a Te confecta, et a Nostra Sacrorum Rituum Cougregatione approbata, et Romanum etiam Missale
adoptare. Concedimus autem et indulgemus, ut antiqua Lugdunensis Ecclesiae Liturgia ab omnibus memoratis novitatibus emendata ad modum et formam qus e ab eadem Nostra Sacrorum Rituum Congregatione fuit sancita, futuris, quoque temporibus licite ac libere possit
servari. Nihil vero dubitamus, Dilecte Fili Noster, quin omni cura studioque hanc Nostram voluntatem exsequi glorieris, ac simul efficias, ut omnes, ad quos spectat, et in posterum quomodolibet spectabit, eidem Nostrae voluntati et praescripto diligenter obtemperent.
Atque etiam futurum confidimus, ut, Deo auxiliante, ii Parochi, qui Nobis, Tibique mœrori, et bonis omnibus offensioni
fuerunt, resipiscant, acquiescant, et optimi Cleri Gallicani imitentur exemplum, qui singulari
Nos et hanc Apostolicam Sedem amore, obsequio
et obedientia prosequi, et egregiis factis de Nobis, atque de
eadem Sede asperrimis
hisce temporibus optime mereri summopere laetatur. Denique omnium cœlestium munerum auspicem et praecipue Nostrae in Te benevolentiae pignus Apostolicam Benedictionem intimo cordis affectu Tibi ipsi, Dilecte
Fili Noster, et gregi Tuae vigilantiae concredito peramanter impertimur.
Datum Romae apud S. Petrum
die 17 Martii Anni 1864,
Pontificatus Nostri Anno Decimo Octavo.
PIVS PP. IX.